མཚོ་སྔོན་གྱིས2026ལོའི་མཐོ་རྒྱུགས་རྒྱུགས་ཤོག་ལ་དཔྱད་བསྡུར་བྱེད་པའི་སྒོ་འབྱེད་ཉིན་མོའི་བྱེད་སྒོ་སྤེལ།
ཟླ6པའི་ཚེས17ཉིན། མཚོ་སྔོན་གྱིས2026ལོའི་མཐོ་རྒྱུགས་དཀྱུས་མའི་རྒྱུགས་ཤོག་ལ་དཔྱད་བསྡུར་བྱེད་པའི་སྒོ་འབྱེད་ཉིན་མོའི་བྱེད་སྒོ་སྤེལ་ཞིང་། དམངས་ཆེན་འཐུས་མི་དང་སྲིད་གྲོས་ཨུ་ཡོན། རྒྱུགས་སྤྲོད་སློབ་མའི་ཁྱིམ་བདག་གི་འཐུས་མི། སྨན་སྦྱོར་ལས་ཁུངས་ཀྱི་གསར་འགོད་པ། དེ་མིན་སློབ་གསོའི་སྒྲིག་ཁྲིམས་ཞིབ་བཤེར་ལྟ་ཞིབ་སྡེ་ཁག་གི་འབྲེལ་ཡོད་འགན་འཁུར་བློ་མཐུན་སོགས་ཁྱོན་བསྡོམས་འཐུས་མི20ལྷག་གདན་འདྲེན་ཞུས་ནས་མཐོ་རྒྱུགས་དཔྱད་བསྡུར་གྱི་བརྒྱུད་རིམ་ཧྲིལ་པོར་ལྟ་སྦྱོང་བྱས་ཏེ། རང་ཞིང་གི་མཐོ་རྒྱུགས་དཔྱད་བསྡུར་བྱ་བའི་གཟབ་ནན་དང་ཚད་ལྡན། དྲང་གཞག་གི་ལམ་སྲོལ་ལ་རྒྱུས་ལོན་བྱས།
2026ལོར་མཚོ་སྔོན་དུ་ཁྱོན་བསྡོམས་རྒྱུགས་སྤྲོད་སློབ་མ་ཁྲི4.73མཐོ་རྒྱུགས་ལ་ཞུགས་པ་དང་། བསླབ་ཚན་ཚང་མར་དྲ་ཐོག་རྒྱུགས་ཤོག་དཔྱད་བསྡུར་བྱེད་སྟངས་མུ་མཐུད་དུ་ཕྱོགས་ཡོངས་ནས་ལག་བསྟར་བྱས་ཤིང་། ཐེངས་འདིའི་རྒྱུགས་ཤོག་དཔྱད་བསྡུར་བྱ་བའི་ཁྲོད་རྐང་འཛིན་དགེ་རྒན400ལ་ཉེ་བ་སྐོང་འཐེན་བྱས་པ་དང་། རིམ་རྩིས་བྱས་ན་རྒྱུགས་སྤྲོད་སློབ་མའི་རྒྱུགས་ཤོག་ཁྲི29ལྷག་ཙམ་གྱི་དཔྱད་གཟིགས་ལས་འགན་ལེགས་འགྲུབ་བྱ་དགོས་པ་རེད།
རྒྱུགས་ཤོག་དཔྱད་བསྡུར་གྱི་མགོ་མ་རྩོམ་པའི་གོང་ལ། རྒྱུགས་སྤྲོད་སློབ་མ་ཚང་མའི་རྒྱུགས་ལན་བྲི་ཤོག་དེ་བཤེར་ཆས་བརྒྱུད་ནས་གློག་རྡུལ་པར་རིས་སུ་བསྒྱུར་བ་དང་། མ་ལག་ལས་དྲི་གཞི་རེ་རེ་རང་འགུལ་ངང་རིགས་བགར་ལེགས་འགྲུབ་བྱུང་རྗེས་སྐབས་བསྟུན་སྒོས་རྒྱུགས་ཤོག་དཔྱད་བསྡུར་དགེ་རྒན་ལ་སྤྲོད་པ་དང་། རྒྱུགས་ཤོག་དཔྱད་བསྡུར་འཆར་ངོས་སུ་རྒྱུགས་ཤོག་གི་དྲིས་ལན་ཁོ་ན་མངོན་པ་ལས། རྒྱུགས་སྤྲོད་སློབ་མའི་མི་སྒེར་གྱི་ཆ་འཕྲིན་དང་དྲི་གཞི་གཞན་དག་གི་ནང་དོན་མཐོང་མི་ཐུབ་པར་བྱས་ཡོད་པས། ལག་རྩལ་གྱི་ངོས་ནས་རྒྱུགས་ཤོག་དཔྱད་བསྡུར་བྱེད་པའི་བརྒྱུད་རིམ་ཁྲོད་མིའི་དྲང་གཞག་མིན་པའི་བྱ་སྤྱོད་རྩ་བ་ནས་གཏན་འགོག་བྱས་ཡོད།
རྒྱུགས་ཤོག་དཔྱད་བསྡུར་བྱ་ཡུལ་དུ་ཁྱོན་ཡོངས་ནས་བཀག་སྡོམ་བྱེད་པའི་དོ་དམ་ལག་བསྟར་དང་བརྒྱུད་རིམ་ཧྲིལ་པོར་ལྟ་སྲུང་བྱས་ཡོད་ལ། རྒྱུགས་ཤོག་དཔྱད་བསྡུར་ལ་ཞུགས་པའི་མི་ཚང་མས་ངེས་པར་དུ་ཆེད་གཏོགས་བྱ་བའི་ལག་ཁྱེར་བཏགས་ནས་བདེ་འཇགས་ཞིབ་བཤེར་བྱས་རྗེས་ད་གཟོད་ནང་དུ་སོང་ཆོག རྒྱུགས་ཤོག་དཔྱད་བསྡུར་ལས་དོན་ཁུལ་དུ་བརྙན་མིག་གིས་ཡོངས་སུ་ཁེབས་པར་བྱས་ཡོད་པ་དང་། ལག་ལེན་གྱི་བརྒྱུད་རིམ་ཧྲིལ་པོར་དུས་མཉམ་དུ་བརྙན་ཕབ་ཉར་ཚགས་ཐུབ་པར་བྱས་ཡོད། རྒྱུགས་ཤོག་དཔྱད་བསྡུར་ས་ཁུལ་ཡོངས་སུ་བརྡ་རྟགས་འགོག་པའི་མ་ལག་བཀོད་སྒྲིག་བྱས་ཏེ། ཕྱོགས་ཡོངས་ནས་རྒྱུགས་ཤོག་དཔྱད་བསྡུར་གཞི་གྲངས་དང་རྒྱུགས་སྤྲོད་སློབ་མའི་ཆ་འཕྲིན་བདེ་འཇགས་ལ་འགན་ལེན་བྱས་ཡོད་པ་རེད།
མིག་སྔའི་བར་རང་ཞིང་གི2026ལོའི་རྒྱུགས་ཤོག་དཔྱད་བསྡུར་བྱ་བ་མཇུག་བསྡུ་བའི་དུས་མཚམས་སུ་སླེབས་ཡོད་པ་དང་། རྗེས་མར་གོ་རིམ་ལྡན་པའི་སྒོ་ནས་རྒྱུགས་ཤོག་གི་སྤུས་ཚད་ལ་འཐེན་བཤེར་དང་རྒྱུགས་འབྲས་ལ་སྣོལ་སྡེབ་དག་བཤེར་ཐེངས་མང་བྱེད་པ། བསྡོམས་སྐར་སྤྱི་བསྡོམས་དང་གཞི་གྲངས་བསྐྱར་ཞིབ་སོགས་ཀྱི་ལས་དོན་སྤེལ་ཏེ། ཟླ6པའི་ཚེས25ཉིན་གྱི་སྔ་གཞུག་ཏུ2026ལོའི་མཐོ་རྒྱུགས་དཀྱུས་མའི་རྒྱུགས་སྤྲོད་སློབ་མའི་རྒྱུགས་འབྲས་སྤྱི་ཚོགས་ལ་ཡོངས་བསྒྲགས་བྱ་རྒྱུའི་འཆར་གཞི་ཡོད་པ་རེད།