རང་ཁུལ་གྱིས་ཞིང་ཕྱུགས་ལས་ཀྱི་འཕེལ་རྒྱས་ལ་སྔར་མེད་ཀྱི་གསོན་ཤུགས་བསྩལ།
མིག་སྔར་ནི་ནོར་ལུག་ལ་ཤ་ཤེད་རྒྱས་པ་དང་ཕྱུགས་ཟོག་ཕྱིར་འཚོང་བྱེད་པའི་དུས་བཟང་སྟེ།ད་མཚམས་ཕྱིར་འཚོང་བྱས་པའི་ནོར་ལུག་ལ་ཤ་ཤེད་རྒྱས་ཤིང་ཤའི་བྲོ་བ་ཞིམ་པས་ཁྲོམ་རས་དགའ་བསུ་ཆེན་པོ་ཐོབ་ཡོད།
ཉེ་སྔོན།གུང་ཧོ་རྫོང་མཚོ་སྔོན་པོ་ཤ་ལས་ཀུང་ཟིའི་ནོར་ལུག་ཤ་ལས་སྣོན་འཁོར་ཁང་དུ་བྲེལ་འཚུབ་ཆེ་བའི་རྣམ་པ་མངོན་ཡོད།ལས་བཟོ་པ་ཚོས་ལུག་ཤ་བགོ་བཞིན་ཡོད་པ་དང་ཤ་ལེབ་མོ་རེ་རེ་ཡིས་ཁོ་ཚོའི་ལུག་ཤའི་རྒྱུ་སྤུས་དང་བརྩོན་སེམས་མཚོན་ཡོད།དེའི་འགྲམ་གྱི་གློག་ཚོང་ཐད་གཏོང་ཁང་དུ་མཛད་སྤྱོད་པ་རྣམས་ཀྱི་དྲི་བ་རེ་རེ་བཞིན་ལན་བཏབ་སྟེ་དྲ་ལམ་ནས་ཤ་ཕྱིར་འཚོང་བྱེད་བཞིན་ཡོད་ལ།དུས་ཚོད་ཐུང་ངུའི་ནང་སྒོར་ཁྲི་བཅུ་ལྷག་གི་ནོར་ལུག་ཤ་བཙོངས་ཡོད་པ་རེད། སྐྱེལ་འདྲེན་ཀུང་ཟིའི་ཆེད་ལས་མི་སྣས་དེ་མ་ཉིད་དུ་ཡུལ་དངོས་སུ་ཤ་ལ་ཐུམ་བརྒྱབ་ནས་མཐོ་སྒང་གི་བྲོ་བ་ཞིམ་པོ་དེ་རྒྱལ་ཡོངས་ཀྱི་ས་གནས་སོ་སོར་བསྐྱལ་བས་མཚོ་ལྷོ་ཁུལ་གྱི་ཞིང་ཕྱུགས་ཐོན་རྫས་སྤུས་རྟགས་དེ་རྒྱལ་ཡོངས་ཀྱི་ཁྲོམ་ར་སོ་སོར་ཐོན་ཡོད།
རང་ཁུལ་ནི་ཞིང་ཆེན་ཡོངས་ཀྱི་གལ་འགངས་ཆེ་བའི་ཞིང་ཕྱུགས་ཐོན་རྫས་ཐོན་སྐྱེད་ཀྱི་རྟེན་གཞི་ཞིག་ཡིན་པའི་ངོས་ནས།ཉེ་བའི་ལོ་འགའི་རིང་ཆེས་ཆེ་བ་གསུམ་གྱི་ཞིང་ཆེན་གྱི་གནས་ཚུལ་དངོས་གནས་ལ་གཞི་ཚུགས་ཏེ།ཐུན་མོང་མ་ཡིན་པའི་སྐྱེ་ཁམས་ཐོན་ཁུངས་དང་ཕུན་སུམ་ཚོགས་པའི་ཕྱུགས་ལས་ཀྱི་དགེ་མཚན་འདོན་སྤེལ་གང་ལེགས་བྱས་ཡོད། སྐྱེ་ཁམས་དཔལ་ཡོན་གྱི་མཐོ་ས་བསྐྲུན་པ་དང་ཐོན་ལས་ཀྱི་གནས་བཞིའི་འཛུགས་སྐྲུན་བྱེད་པའི་འཐབ་ཇུས་ཀྱི་གོ་སྐབས་འོག་མཚོ་ལྷོ་ཁུལ་གྱིས་སྐྱེ་ཁམས་དང་ཐོན་ལས་མཉམ་དུ་འཛིན་རྒྱུ་མཐའ་འཁྱོངས་བྱས་ཏེ།རྒྱུད་བཟང་གསོ་སྤེལ་དང་གསོ་སྤེལ་ཀྱི་གཞི་ཁྱོན་ཚད་ལྡན་ཅན།ལས་སྣོན་ནུས་པ་འགན་ལེན་དང་།ཐོན་ཚོང་འབྲེལ་མཐུད་ལ་སྐུལ་འདེད་གཏོང་བ་བཅས་བྱས་ནས།ཞིང་ཕྱུགས་ལས་ཐོན་ལས་ཅན་གྱི་འཚོང་གཉེར་ལམ་སྲོལ་གསར་གཏོད་བྱས་ཏེ།ཕྱུགས་ལས་ཀྱི་ཐོན་ལས་སྦྲེལ་ཐག་དབྱར་མཚོ་རྒྱས་པ་ལྟར་འཕེལ་རྒྱས་སུ་འགྲོ་རྒྱུར་སྐུལ་འདེད་བཏང་།
དེ་ལས་ཀྱང་གླེང་རིན་ཡོད་པ་ཞིག་ནི2022ལོར་མཚོ་ལྷོ་ཁུལ་ལ་རྒྱལ་སྲིད་སྤྱི་ཁྱབ་ཁང་གིས་མཆན་འགོད་བཀའ་ལན་གནང་ནས་རྒྱལ་ཁབ་ཀྱི་རྒྱུན་མཐུད་འཕེལ་རྒྱས་ཀྱི་གྲོས་རིམ་གསར་གཏོད་དཔེ་སྟོན་ཁུལ་འཛུགས་སྐྲུན་བྱས་པ་དེས་སྤུས་ཚད་མཐོ་བའི་འཕེལ་རྒྱས་ལ་སྒུལ་ཤུགས་གསར་པ་བསྣན་ཡོད། ཁུལ་ཨུ་དང་ཁུལ་སྲིད་གཞུང་གིས་མགྱོགས་མྱུར་གྱིས་སྡེ་ཁག་ལས་བརྒལ་བའི་བྱ་བའི་མགོ་ཁྲིད་ཚན་ཆུང་བཙུགས་ཏེ། བྱ་བར་སྐུལ་འདེད་གཏོང་བའི་ལམ་སྲོལ་དང་མགོ་ཁྲིད་ཚན་ཆུང་གི་སྒྲིག་སྲོལ།འཕེལ་རྒྱས་ཀྱི་འཆར་འགོད་རབ་དང་རིམ་པ་བཟོས་ནས་གསར་གཏོད་དཔེ་སྟོན་ཁུལ་ཕྱོགས་ཡོངས་ནས་འཛུགས་སྐྲུན་བྱེད་པར་རྨང་གཞི་བརྟན་པོ་བཏིང་།
ད་ལོའི་སྟོན་དུས་སུ་མཚོ་ལྷོ་ཁུལ་གྱིས་སྟོན་བསྡུ་དང་ནོར་ལུག་ཕྱིར་འཚོང་བྱེད་པའི་དུས་སྐབས་དམ་འཛིན་བྱས་ཏེ།དུས་ཐོག་ཏུ《མཚོ་ལྷོ་ཁུལ་ནོར་ལུག་ཤ་ཕྱིར་འཚོང་བྱ་རྒྱུར་སྐུལ་ལྕག་དང་རྒྱབ་སྐྱོར་བྱས་ནས་མང་ཚོགས་ཀྱི་ཡོང་སྒོ་འཕར་རྒྱུར་སྐུལ་འདེད་གཏོང་བའི་བྱ་ཐབས་བརྒྱད》བཏོན་ཞིང་།བྱ་ཐབས་དེས་རོང་འབྲོག་པའི་ཡོང་འབབ་རྒྱུན་མཐུད་ངང་འཕར་བ་དང་ནོར་ལུག་ཤའི་འཛད་སྤྱོད་ལ་སྐུལ་འདེད་གཏོང་བའི་འབྲེལ་ཡོད་བླང་བྱ་ཕྱོགས་ཡོངས་ནས་དོན་འཁྱོལ་བྱས་ཏེ། འཛད་སྤྱོད་རོགས་སྐྱོར་ལམ་སྲོལ་བཙུགས་ནས་ཐབས་མང་མཉམ་སྤྱོད་ཀྱིས་མང་ཚོགས་ཀྱི་ཡོང་སྒོ་འཕར་བར་རོགས་རམ་བྱས་པ་རེད།མིག་སྔའི་བར།ཁུལ་རིམ་པའི་ནོར་སྲིད་ཀྱིས་ཆེད་དོན་ཁ་གསབ་སྒོར་ཁྲི1100བཀོད་སྒྲིག་བྱས་པ་དེའི་ནང་ལུག་རེའི་ཕྱིར་འཚོང་ཁ་གསབ་སྒོར10དང་ནོར་རེའི་ཕྱིར་འཚོང་ཁ་གསབ་སྒོར30སྤྲད་པ་དང་།ཁྱིམ་ཚང་དབུལ་པོ་དང་ལྟ་ཞིབ་ཚད་ལེན་ཁྱིམ་ཚང་ལ་ཁ་གསབ་ཀྱི་ཚད་གཞི་དེ་བས་མཐོན་པོ་སྤྲད།དེ་དང་ཆབས་ཅིག་ཁུལ་ཞིང་ཕྱུགས་ཐོན་ལས་འཕེལ་རྒྱས་ཚད་ཡོད་འགན་འཁྲི་ཀུང་ཟིས་སྣེ་ཁྲིད་དེ་མ་དངུལ་སྒོར་ཁྲི50བཏང་ནས།ཞིང་ཆེན་ཕྱི་ནང་དུ་བཙུགས་པའི་ནོར་ལུག་ཤ་ཐད་ཚོང་ཁང་དང་ཉམས་ལེན་ཁང་ངམ་ཡང་ན་ཕྱིར་འཚོང་ས་ཚིགས་ལ་དཔྱད་ཞིབ་བྱས་ཏེ།ལོ་རེའི་ཕྱིར་འཚོང་བྱེད་ཚད་ཏུན10ཡན་ཟིན་པའི་ཚོང་གཉེར་བྱེད་མཁན་ལ་ཕྱིར་འཚོང་བྱེད་ཚད་དངོས་ཀྱི3%ཡི་བྱ་དགའ་སྤྲད་པ་རེད།
ཞིང་ཕྱུགས་ཐོན་རྫས་ཕྱིར་གཏོང་བྱ་ཡུལ་འཛུགས་སྐྲུན་ལ་སྐུལ་འདེད་གཏོང་བའི་རྒྱང་བསྐྱོད་ལམ་བུའི་ཁྲོད་མཚོ་ལྷོ་ཁུལ་མཁོ་ཚོང་མཉམ་ལས་ཁང་གིས་རང་ངོས་ཀྱི་དགེ་མཚན་འདོན་སྤེལ་གང་ལེགས་བྱས་ཏེ། ཕྱིར་འཚོང་ལས་སྟེགས་བཏོད་ནས་རོང་འབྲོག་མང་ཚོགས་ལ་ཕྱོགས་ཡོངས་ཀྱི་ཞབས་ཞུའི་འགན་ལེན་བྱས་ཤིང་།སྣ་མང་ཕུན་སུམ་ཚོགས་པའི་ཞིང་ཕྱུགས་ཐོན་རྫས་འགྲེམས་འཚོང་ཚོགས་འདུ་དང་དཔྱད་བསྡུར་བྱ་འགུལ་རྩ་འཛུགས་བྱས་པ་བརྒྱུད་ས་གནས་ཀྱི་ཞིང་ཕྱུགས་ཐོན་རྫས་ཀྱི་སྙན་གྲགས་ཆེ་རུ་ཕྱིན་པ་མ་ཟད།ད་དུང་དྲ་ཐོག་དང་ཡུལ་དངོས་ཀྱི་འཛད་སྤྱོད་མཉམ་འདྲེས་གཏིང་ཟབ་ཡོང་རྒྱུར་སྐུལ་འདེད་བཏང་ཞིང་།མཁོ་ཚོང་མཉམ་ལས་ཁང་གིས་ཁུལ་དང་རྫོང་རིམ་པ་གཉིས་ཀྱི་སྲིད་གཞུང་སྡེ་ཁག་དང་བཅའ་སྡོད་ལས་ཁུངས་བཅས་ལ་མཉམ་འབྲེལ་བྱས་ཏེ།ས་གནས་ཀྱི་ནོར་ལུག་ཤ་སོགས་ཞིང་ཕྱུགས་ཐོན་རྫས་སློབ་གྲྭ་དང་ལས་ཁུངས།སྨན་ཁང་།དམག་ཁུལ། སྡེ་ཁུལ། སྒོ་རྩིས་ཚོང་ཁང་བཅས་སུ་བཙོངས་ནས་ས་གནས་རང་དུ་འཛད་སྤྱོད་ཐུབ་པར་བྱས་ཏེ། རོང་འབྲོག་མང་ཚོགས་ཀྱི་ཡོང་འབབ་འཕར་བར་སྒུལ་ཤུགས་ཆེན་པོ་བསྣན།
མཁོ་ཚོང་མཉམ་ལས་ཁང་གིས་ད་དུང་ཞིང་སྡེའི་གློག་ཚོང་དཔལ་འབྱོར་འཕེལ་རྒྱས་ལ་སྐུལ་འདེད་བཏང་ནས། མྱུར་སྐྱེལ་ཁེ་ལས་དང་མཉམ་འབྲེལ་བྱས་ཏེ།སྦྲག་སྲིད་དང་གློག་རྡུལ་ཚོང་དོན།མཉམ་ལས་གཉེར་སྐྱོང་བཅས་ཀྱི་རྣམ་པ་གསར་པ་བཏོད་དེ་མྱུར་སྐྱེལ་གཏོང་ལེན་དང་ཞིང་ལས་དམིགས་བསལ་ཐོན་རྫས་ཕྱིར་འཚོང་བྱས་ཏེ་ཞིང་སྡེ་མང་ཚོགས་ཀྱི་དཀའ་གནད་ཐག་གཅོད་བྱས་ཤིང་།གློག་ཚོང་སྟེགས་བུ་བསྐྲུན་པ་བརྒྱུད་མཚོ་ལྷོ་ཁུལ་གྱི་ཞིང་ཕྱུགས་ཐོན་རྫས་དེ་རི་ཆུ་ཁྲི་སྟོང་བརྒལ་ནས་རྒྱལ་ཡོངས་ཀྱི་ས་གནས་སོ་སོར་བྲིན་ཁ་རྒྱུག་པ་དང་ཐ་ན་འཛམ་གླིང་གི་ཁྲོམ་རར་ཡང་བསྐྱོད་པ་རེད།
མཚོ་ལྷོ་ཁུལ་ཞིང་ལས་གསར་སྤེལ་ཀུང་ཟི་དེ་ཁུལ་ནང་གི་ཞིང་ཕྱུགས་ལས་ཀྱི་སྣེ་ཁྲིད་ཁེ་ལས་ཤིག་ཡིན་པའི་ངོས་ནས་ཞིང་ཕྱུགས་ཐོན་རྫས་ཕྱིར་གཏོང་བྱ་ཡུལ་འཛུགས་སྐྲུན་ལ་སྐུལ་འདེད་གཏོང་བའི་ཁྲོད་གལ་འགངས་ཆེ་བའི་ནུས་པ་འདོན་སྤེལ་བྱས་ཡོད།ཁོང་ཚོས་ཚན་རྩལ་གསར་གཏོད་སྣེ་ཁྲིད་དུ་བྱ་རྒྱུ་མཐའ་འཁྱོངས་བྱས་ཏེ།ལག་རྩལ་གསར་པ་དང་རྣམ་པ་གསར་པ་ནང་འདྲེན་བྱས་ནས་ཞིང་ཕྱུགས་ཐོན་རྫས་ཀྱི་སྤུས་ཚད་དང་ཐོན་ཚད་མཐོ་རུ་བཏང་ཡོད་ལ།དེ་དང་ཆབས་ཅིག་ཞིང་ལས་གསར་སྤེལ་ཀུང་ཟིས་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཀྱི་སྤུས་རྟགས་གཏོད་རྒྱུར་གཞོལ་ནས་ཐོག་མའི་ཐོན་ཡུལ་གྱི་ཁུངས་འདེད་ཆོག་པའི་མ་ལག་དང་རང་བྱུང་རྩྭ་རའི་ས་ཁོངས་ཡོངས་ཀྱི་སྐྱེ་ལྡན་ལྟ་ཞིབ་ཚད་ལེན་གྱི་དཔང་དངོས་ར་སྤྲོད་བྱ་བར་ཤུགས་བསྣན་ཞིང་།ཁོང་ཚོས་སྤུས་ཚད་དོ་དམ་མ་ལག་ཆ་ཚང་ཞིག་བཙུགས་ནས་ཐོན་རྫས་ཚང་མ་ལྷད་མེད་སྐྱེ་ལྡན་གྱི་བླང་བྱ་ནན་མོ་དང་མཐུན་པར་འགན་ལེན་བྱས།གཞན་ཡང་ཞིང་ལས་གསར་སྤེལ་ཀུང་ཟིས་ད་དུང་ཚན་རིག་ཞིབ་འཇུག་ཁང་དང་མཉམ་ལས་དམ་ཟབ་བྱས་ཏེ་ཚན་རྩལ་འགག་སྒྲོལ་དང་ལག་རྩལ་གསར་གཏོད་ཀྱི་བྱ་འགུལ་སྤེལ་ནས་ཞིང་ཕྱུགས་ཐོན་ལས་ཀྱི་ཕྱོགས་སྒྱུར་རིམ་སྤོར་ལ་འགུལ་ཤུགས་ཆེན་པོ་བསྩལ་ཡོད།
འབྱུང་འགྱུར་ལ་རྒྱང་ལྟ་བྱེད་དུས།མཚོ་ལྷོ་ཁུལ་གྱིས་ལྗང་མདོག་འཕེལ་རྒྱས་ཀྱི་བསམ་བློ་མུ་མཐུད་དུ་རྒྱུན་འཁྱོངས་བྱས་ཏེ།ཞིང་ཕྱུགས་ལས་ཀྱི་མཁོ་སྤྲོད་ཕྱོགས་ཀྱི་གྲུབ་ཆའི་རང་བཞིན་གྱི་སྒྱུར་བཅོས་གཏིང་ཟབ་ཏུ་གཏོང་བ་དང་།ཞིང་ཕྱུགས་ཐོན་རྫས་ཀྱི་ཟུར་སྣོན་རིན་ཐང་།ཁྲོམ་རའི་འགྲན་རྩོད་ནུས་པ་མུ་མཐུད་དུ་ཆེ་རུ་བཏང་ནས།རེ་བས་ཁེངས་པའི་ས་གཞི་འདིར་ཞིང་ཕྱུགས་ལས་ཀྱི་འཕེལ་རྒྱས་ལ་སྔ་ན་མེད་པའི་གསོན་ཤུགས་བསྩལ་དེ།སྔར་ལས་དར་རྒྱས་དང་རྒྱུན་མཐུད་ཐུབ་པའི་འབྱུང་འགྱུར་ལ་གོམ་སྟབས་བརྟན་པོས་བསྐྱོད་ནུས་སོ།