ཐུན་ཏེ་རྫོང་སྤྱི་བདེ་ཅུའུ་ཡིས་སློབ་གྲྭའི་ཟས་རིགས་བདེ་འཇགས་ལ་ཁག་ཐེག་བྱས་པ།
རང་ཚགས་པར་གྱི་འཕྲིན།ཉེ་ཆར་ཐུན་ཏེ་རྫོང་སྤྱི་བདེ་ཅུའུ་ཡིས་མི་དམངས་ཉེན་རྟོག་པ་རྩ་འཛུགས་བྱས་ཏེ། སློབ་གྲྭའི་ཟས་རིགས་བདེ་འཇགས་དོ་དམ་ལ་ཤུགས་སྣོན་བྱེད་རྒྱུའི་སྐོར་གྱི་འབོད་བརྡ་བཏང་ནས་སློབ་གྲྭ་ཆུང་འབྲིང་དུ་ཟས་རིགས་བདེ་འཇགས་ལ་ཞིབ་བཤེར་བྱེད་པའི་བྱ་འགུལ་སྤེལ།ཐེངས་འདིར་སློབ་གྲྭའི་ཟས་རིགས་བདེ་འཇགས་ལ་ཞིབ་བཤེར་བྱེད་པའི་བྱ་བའི་ཁྲོད་རྫོང་སྤྱི་བདེ་ཅུའུ་ཡིས་སློབ་གྲྭའི་ཟ་ཁང་གི་ཕྱོགས་ཡོངས་ལ་ཞིབ་བཤེར་བྱས་ཤིང་།གཙོ་བོ་ཟས་རིགས་གཡོས་སྦྱོར་འཛིན་ཡིག་དང་ལས་གཉེར་མི་སྣའི་བདེ་ཐང་ལག་ཁྱེར་སོགས་འབྲེལ་ཡོད་ཡིག་ཆ་དང་དེ་མིན་ཟས་རིགས་ཉོ་སྒྲུབ་ཀྱི་རྩིས་ཐོ།ཟས་རིགས་གསོག་ཉར་ཆ་རྐྱེན།ཟས་རིགས་ལས་སྣོན་བརྒྱུད་རིམ།བཟའ་བཅའི་ཡོ་བྱད་དུག་སེལ།ཟས་རིགས་རྒྱུ་ཆའི་ཐོན་ཁུངས་ཚད་ལྡན་ཡིན་མིན།དུས་ཡོལ་ཀྱི་ཟས་རིགས་ཡོད་མེད།ཟ་ཁང་ནང་གི་གཙང་སྦྲ་སོགས་གཙོ་གནད་དུ་བཟུང་ནས་ཞིབ་བཤེར་བྱས་ཤིང་། ཞིབ་བཤེར་བྱེད་སྐབས་ཟས་རིགས་མ་དཔེ་གསོག་ཉར་ལམ་ལུགས་ལག་བསྟར་བྱས་ཚུལ་ལ་དམིགས་བསལ་གྱིས་ཞིབ་བཤེར་བྱས་ནས་ཟས་རིགས་བདེ་འཇགས་ཀྱི་གནད་དོན་ཐོན་མ་ཐག་མགྱོགས་མྱུར་སྒོས་འབྱུང་རྩ་ཁུངས་འདེད་བྱེད་ཐུབ་པ་དང་དུས་ཐོག་ཏུ་ཐག་གཅོད་བྱེད་ཐུབ་པར་འགན་ལེན་བྱས་པ་རེད།ཞིབ་བཤེར་བྱེད་སྐབས་སློབ་གྲྭ་ཁག་ཅིག་གི་ཟ་ཁང་དུ་ཟས་རིགས་རྒྱུ་ཆ་སྒྲིག་བཤམས་བྱས་པ་ཚད་ལྡན་མིན་པ་དང་ཟ་ཁང་གི་གཙང་སྦྲ་མི་ལེགས་པ་སོགས་ཀྱི་གནད་དོན་ཡོད་པར་འཕྲལ་མར་སློབ་གྲྭར་ཡར་ཞུ་བྱས་ནས་ཡུལ་དངོས་སུ་བཅོས་སྒྲིག་བྱ་རྒྱུར་མཛུབ་ཁྲིད་བྱས་ཏེ།གནད་དོན་དུས་ཐོག་ཏུ་ཐག་གཅོད་བྱེད་པར་འགན་ལེན་བྱས།ལས་རིམ་རྗེས་མར།ཐུན་ཏེ་རྫོང་སྤྱི་བདེ་ཅུའུ་ཡིས་སློབ་གྲྭ་དང་སློབ་གྲྭའི་ཉེ་འཁོར་གྱི་ཟས་རིགས་བདེ་འཇགས་ལ་ལྟ་སྐུལ་དོ་དམ་བྱེད་ཤུགས་མུ་མཐུད་དུ་ཆེ་རུ་གཏོང་བ་དང་ལྟ་སྐུལ་དོ་དམ་ལམ་སྲོལ་འཐུས་ཚང་དུ་བཏང་ནས། རྒྱ་ཆེའི་དགེ་སློབ་ཚོའི་ཟས་རིགས་བདེ་འཇགས་ལ་འགན་ལེན་བྱ་རྒྱུ་རེད། དེ་དང་ཆབས་ཅིག་ཏུ། ཟས་རིགས་བདེ་འཇགས་ཀྱི་དྲིལ་སྒྲོག་སློབ་གསོར་ཤུགས་བསྣན་ནས་རྒྱ་ཆེའི་དགེ་སློབ་ཡོངས་ཀྱི་ཟས་རིགས་བདེ་འཇགས་འདུ་ཤེས་དང་རང་སྲུང་ནུས་པ་ཆེ་རུ་བཏང་སྟེ།ཐུན་མོང་གིས་བདེ་འཇགས་དང་སྐྱོན་བྲལ།ཞི་མཐུན་བཅས་ཀྱི་སློབ་གྲྭའི་ཁོར་ཡུག་ཅིག་བསྐྲུན་རྒྱུ་རེད།།