རང་ཁུལ་གྱིས་ཁུལ་ཨུའི་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་བསྡུས་པ།
རང་ཚགས་པར་གྱི་འཕྲིན།ཟླ11པའི་ཚེས28ཉིན།ཁུལ་ཨུའི་ཧྲུའུ་ཅི་ལིས་ཀང་གིས་མགོ་འཛིན་བྱས་ཏེ་ཁུལ་ཨུའི་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་བསྡུས་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་མཆན་འགོད་མཛུབ་སྟོན་གལ་ཆེན་གྱི་དགོངས་དོན། ཀྲུང་དབྱང་དང་ཞིང་ཆེན་ཏང་ཨུའི་འབྲེལ་ཡོད་ཚོགས་འདུའི་དགོངས་དོན་བརྒྱུད་སྒྲོག་དང་སློབ་སྦྱོང་བྱས།འབྲེལ་ཡོད་བྱ་བའི་གནས་ཚུལ་གྱི་སྙན་ཞུར་ཉན་པ་དང་འབྲེལ་ཡོད་ཡིག་ཆར་གྲོས་ཞིབ་བྱས་ནས་རྗེས་ཕྱོགས་ཀྱི་བྱ་བར་ཞིབ་འཇུག་དང་བཀོད་སྒྲིག་བྱས་པ་རེད།
ཚོགས་འདུ་ལས་ཀྲུའུ་ཞི་ཞི་ཅིན་ཕིང་ཨེ་ཤེ་ཡ་དང་ཞི་བདེ་རྒྱ་མཚོ་ཆེན་མོའི་དཔལ་འབྱོར་མཉམ་ལས་རྩ་འཛུགས་ཀྱི་མགོ་ཁྲིད་པའི་དངོས་གཞི་མིན་པའི་ཚོགས་འདུ་ཐེངས་སོ་གཅིག་པ་དང་རྒྱལ་ཁབ་ཉི་ཤུའི་འཚོགས་པའི་མགོ་ཁྲིད་པའི་རྩེ་གྲས་གྲོས་ཚོགས་ཐེངས་བཅུ་དགུ་པར་ཞུགས་སྐབས་གནང་བའི་གསུང་བཤད་གལ་ཆེན་གྱི་དགོངས་དོན་གྱིས་ཀྲུང་གོའི་རང་ངོས་འཕེལ་རྒྱས་ཀྱི་ཉམས་མྱོང་གཞིར་བཟུང་ནས་ཚོགས་འདུའི་བརྗོད་དོན་གཙོ་བོར་དམིགས་ཏེ།དྲང་བདེན་འཛིན་ཅིང་གསར་གཏོད་ཀྱི་ནུས་པ་ལྡན་པའི་རྒྱལ་ཁབ་ཆེན་མོ་ཞིག་གི་བློ་གྲོས་དང་སྟོབས་ཤུགས་མངོན་ཡོད་ལ། ཁུལ་ཡོངས་ཀྱི་རིམ་པ་སོ་སོའི་ཏང་ཨུ(ཏང་ཙུའུ)ཡིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་འཚམས་འདྲིར་ཕེབས་སྐབས་ཀྱི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་།ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་ཐོག་ཆུ་ཚད་མཐོ་བའི་ཕྱི་ཕྱོགས་ལ་སྒོ་མོ་འབྱེད་པའི་སྒྲིག་སྲོལ་དང་ལམ་སྲོལ་འཐུས་ཚང་དུ་གཏོང་རྒྱུའི་ཐད་བཏོན་པའི་འཐབ་ཇུས་བཀོད་སྒྲིག་དོན་འཁྱོལ་ནན་མོ་བྱས་ཏེ། རྒྱུད་གཅིག་ལམ་གཅིག་མཉམ་སྐྲུན་ནང་མཉམ་འདྲེས་གཏིང་ཟབ་བྱེད་པ་དང་མཚོ་ལྷོས་ཕྱི་ནང་གཉིས་ཀར་སྒོ་མོ་འབྱེད་པའི་ཆུ་ཚད་མུ་མཐུད་དུ་ཆེར་བཏང་ནས།རྒྱལ་ཁབ་ཀྱི་སྤྱི་ཡོངས་ཀྱི་ཕྱི་འབྲེལ་ལ་ཞབས་འདེགས་སྔར་ལས་ལེགས་པོ་ཞུ་དགོས་པ་དང་།སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་པུར་འཇུག་ཁྱབ་ཁོངས་ཀྱི་རུལ་སུངས་སྣང་ཚུལ་བཅོས་སྒྱུར་བྱ་རྒྱུའི་སྐོར་གྱི་མཆན་བཀོད་མཛུབ་སྟོན་གལ་ཆེན་གྱིས་ང་ཚོར་རུལ་སུངས་ངོ་རྒོལ་བྱེད་པར་བཀག་རྒྱ་མེད་པའི་ཉེན་བརྡ་བཏང་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དམངས་ལ་བཅངས་པའི་བརྩེ་སེམས་ཟབ་མོ་མངོན་པར་བྱས་ཡོད།ས་གནས་སོ་སོ་དང་འབྲེལ་ཡོད་སྡེ་ཁག་སོ་སོས་ཆབ་སྲིད་ཀྱི་ལངས་ཕྱོགས་ཇེ་བརྟན་དུ་བཏང་ནས།པུར་འཇུག་ཁྱབ་ཁོངས་ཀྱི་རུལ་སུངས་བྱ་བ་བཅོས་སྒྱུར་བྱ་རྒྱུ་དེ་མང་ཚོགས་ཉེ་འགྲམ་གྱི་ཚུལ་མིན་སྤྱོད་ཚུལ་དང་རུལ་སུངས་གནད་དོན་ཐག་གཅོད་བྱེད་པའི་བྱ་བ་གལ་ཆེན་ཞིག་ཏུ་བརྩིས་ཏེ།ཆེད་དོན་བྱ་སྤྱོད་དམ་འཛིན་ནན་མོ་བྱེད་པ་དང་ཁྱབ་ཁོངས་ཀྱི་བཅོས་སྒྱུར་བྱ་བར་ཤུགས་སྣོན་པ།བྱ་བའི་ལམ་སྲོལ་འཐུས་སྒོ་ཇེ་ཚང་དུ་གཏོང་བ་དང་ལས་རིགས་ཀྱི་ཞབས་ཞུ་ཚད་ལྡན་དུ་བཏང་ནས་མི་དམངས་མང་ཚོགས་ཀྱི་པུར་འཇུག་ཞབས་ཞུའི་དགོས་མཁོ་དེ་བས་ལེགས་པའི་སྒོ་ནས་སྐོང་བ་དང་མང་ཚོགས་ཀྱི་འདས་མཆོད་སྒྲུབ་པའི་ཁུར་པོ་ཇེ་ཡང་དུ་གཏོང་དགོས་པར་བསྟན།
ཚོགས་འདུའི་སྟེང་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་མགོ་ཁྲིད་གཙོ་བོས་ཉེ་སྔོན་མཚོ་ལྷོར་རྟོག་ཞིབ་གནང་སྐབས་ཁུལ་ཡོངས་ཀྱི་བྱ་བར་ཁས་ལེན་གང་ལེགས་བྱས་པ་མ་ཟད།ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་བྱེད་ས་དང་། ལྗང་མདོག་གློག་རྩིས་ཐོན་ལས་འཕེལ་རྒྱས།གུང་ཧོ་གཤོང་སའི་རྒྱལ་ཁབ་ཀྱི་མངའ་ཁོངས་བར་སྟོང་འཆར་འགོད།རྫོང་ཁོངས་ཀྱི་སྨན་བཅོས་ཞབས་ཞུའི་ཐུན་མོང་ཚོགས་པའི་འཛུགས་སྐྲུན།མི་གཙོར་འཛིན་པའི་གྲོང་ཁྱེར་དང་གྲོང་རྡལ་ཅན་གསར་པ་འཛུགས་སྐྲུན། མཚོ་སྔོན་པོའི་དཔེ་སྟོན་ཁུལ་འཛུགས་སྐྲུན་བཅས་ལ་རེ་བ་ནན་མོ་བཟུང་པ་དེས་ང་ཚོ་དེང་རབས་ཅན་གྱི་མཚོ་ལྷོ་གསར་པའི་ལམ་ཁར་ཤུགས་ཀྱིས་བསྐྱོད་དགོས་པར་དོན་སྙིང་གལ་ཆེན་ལྡན་པ་རེད།ཁུལ་ཨུའི་རྒྱུན་ལས་ཨུ་ཡོན་ལྷན་ཁང་དང་ཁུལ་རིམ་པའི་ཚན་ཁག་སོ་སོའི་མགོ་ཁྲིད་ཀྱིས་ནུས་པ་འདོན་སྤེལ་བྱས་ཏེ།མགྱོགས་མྱུར་ངང་བརྒྱུད་སྒྲོག་དང་སློབ་སྦྱོང་།ཞིབ་བསྡུར་དང་སྤེལ་རེས་གཏིང་ཟབ།བྱ་བའི་ཁ་ཕྱོགས་གསལ་བ།སྣེ་ཁྲིད་ཀྱི་ནུས་པ་དོན་འཁྱོལ་ཡོང་བར་སྐུལ་འདེད་བཅས་བྱ་དགོས་ཤིང་།རིམ་པ་སོ་སོའི་ཏང་ཨུ(ཏང་ཙུའུ)ཡིས་དུས་ལྟར་བརྒྱུད་སྒྲོག་དང་སློབ་སྦྱོང་བྱས་ཏེ།དགོངས་དོན་ཁོང་དུ་ཆུད་པ་དང་གོ་བ་གཏིང་ཟབ་བླངས་ནས་དོན་ཐོག་ཏུ་འཁྱོལ་བར་བྱས་ཏེ།བསམ་བློ་དང་སྤྱོད་སྟངས་གཉིས་ཀྱི་ཐོག་ནས་གསུང་བཤད་ཀྱི་དགོངས་དོན་དང་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་བཀོད་སྒྲིག་བླང་བྱའི་ཐོག་གཅིག་གྱུར་ཡོང་བར་བྱ་དགོས་ཤིང་།ལྗང་མདོག་གློག་རྩིས་ཐོན་ལས་འཕེལ་རྒྱས་དང་གུང་ཧོ་གཤོང་སའི་ས་ཁོངས་ཀྱི་ལྟེ་བའི་གྲོང་ཁྱེར་འཛུགས་སྐྲུན།ལོ་ལྔའི་འཆར་གཞི་བཅོ་ལྔ་པའི་འཆར་འགོད་བཟོ་བཀོད། གྲོང་ཁྱེར་དང་གྲོང་གསེབ་མཉམ་འདྲེས་འཕེལ་རྒྱས།མཚོ་སྔོན་པོའི་དཔེ་སྟོན་ཁུལ་འཛུགས་སྐྲུན་སོགས་ཀྱི་ཞིབ་ཕྲའི་བཀོད་སྒྲིག་བླང་བྱར་དམ་པོར་དམིགས་ཏེ། དོན་འཁྱོལ་བྱེད་ཐབས་གཏན་འབེབས་དང་ལས་འགན་ཁག་བགོས་ཞིབ་ཕྲ།གསལ་ཐོ་དོ་དམ་ལག་བསྟར་བཅས་བྱ་དགོས།ཞིང་ཆེན་རིམ་པའི་འབྲེལ་ཡོད་སྡེ་ཚན་བར་འབྲེལ་མཐུད་བྱ་རྒྱུར་ཤུགས་སྣོན་བྱས་ཏེ།བྱ་བ་སོ་སོར་ཕན་འབྲས་ཐོན་པ་དང་གྲུབ་འབྲས་དངོས་ཐོན་པར་འགན་ལེན་བྱ་དགོས།སྐྱེ་ཁམས་སྲུང་སྐྱོང་དང་ཡུལ་སྐོར་འཕེལ་རྒྱས།དམངས་ཚིས་འགན་སྲུང་བཅས་ཕྱོགས་གསུམ་གྱི་འབྲེལ་བ་གཅིག་གྱུར་གྱིས་ཐག་གཅོད་ཡག་པོ་བྱེད་པ་དང་།མཚོ་སྐོར་ལྷོ་ངོགས་ཀྱི་བཙོག་ཆུ་དང་གད་སྙིགས་བཅོས་སྐྱོང་།རྨང་གཞིའི་སྒྲིག་བཀོད་ལེགས་བཅོས།ཡུལ་སྐོར་ཞབས་ཞུ་རིམ་སྤོར།རོང་འབྲོག་མང་ཚོགས་གནས་སྤོ་བཀོད་སྒྲིག་སོགས་ཀྱི་བྱ་བར་སྐུལ་འདེད་གཏོང་བའི་གོམ་སྟབས་ཇེ་མགྱོགས་སུ་གཏོང་བ་དང་། རྒྱལ་སྤྱིའི་སྐྱེ་ཁམས་ཡུལ་སྐོར་གྱི་དམིགས་ས་ཡིན་པའི་མཚོ་སྔོན་པོའི་དཔེ་སྟོན་ཁུལ་གསར་འཛུགས་བྱ་བར་རོགས་རམ་བཅས་བྱ་དགོས།སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་འགོད་མཛུབ་སྟོན་གལ་ཆེན་གྱི་དགོངས་དོན་དང་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་མགོ་ཁྲིད་གཙོ་བོའི་བྱ་བའི་བླང་བྱ།མཛུབ་སྟོན་དང་མཆན་འགོད་མཛུབ་སྟོན་གྱི་དགོངས་དོན་ལག་བསྟར་དོན་འཁྱོལ་བྱེད་པའི་གཉེར་སྒྲུབ་ལམ་སྲོལ་འཐུས་ཚང་དུ་བཏང་ནས།འགན་འཁྲིའི་སྦྲེལ་ཐག་སྔར་ལས་ཇེ་དམ་དུ་བཏང་སྟེ་བྱ་བ་དོན་འཁྱོལ་བྱེད་པའི་སྤུས་ཚད་དང་ཕན་འབྲས་ཆེ་རུ་གཏོང་དགོས་ཞེས་ནན་གྱིས་བསྟན།
གྲོས་ཚོགས་ལས་ཀོང་ཏུང་ཀྲུའུ་ཧའེ་དང་ཅང་སུའུ་ཝུའུ་ཞི།ཧུའུ་ནན་ཁྲང་ཏེ་སོགས་ས་ཁུལ་དུ་བསྟུད་མར་རླངས་འཁོར་གྱིས་རྐང་ཐང་བར་བརྡུངས་པ་དང་། གྲི་བཟུང་ནས་མི་ཚོགས་གྲས་སུ་རྒྱུག་ནས་མི་ལ་རྨས་སྐྱོན་བཟོས་པ་སོགས་ཐལ་དྲགས་པའི་གྱོད་གཞི་བྱུང་བས།ཤི་རྨས་ཚབས་ཆེན་བྱུང་བ་དང་བསླབ་བྱ་གཏིང་ཟབ་ཅིང་མི་རྣམས་ལ་དྲན་སྐུལ་བྱས་ཡོད་པས།ས་གནས་སོ་སོ་དང་སྡེ་ཁག་སོ་སོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་ནན་མོ་བྱེད་པ་དང་།ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་།ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་བཀོད་སྒྲིག་བླང་བྱ་དོན་འཁྱོལ་བྱས་ཏེ་བསླབ་བྱ་བསྡུ་ལེན་གཏིང་ཟབ་དང་གཅིག་ཤེས་ཀུན་གྲོལ་གྱིས་ཉེན་ཁ་དང་བྱུར་རྐྱེན་གྲལ་བཤེར་དང་གནད་དོན་སེལ་རྒྱུར་དམ་འཛིན་བྱེད་པ།བདེ་འཇགས་ཐོན་སྐྱེད་ཀྱི་ཆེད་དོན་སྒྲིག་བཅོས་གཏིང་ཟབ་བྱས་ཏེ།སྤྱི་པའི་བདེ་འཇགས་དང་སྤྱི་ཚོགས་བདེ་འཇགས་ཀྱི་འགོག་སྲུང་ཇེ་བརྟན་དུ་བཏང་ནས།མི་དམངས་མང་ཚོགས་ཀྱི་ཚེ་སྲོག་བདེ་འཇགས་དང་སྤྱི་ཚོགས་བརྟན་བརླིང་ནུས་ཤུགས་ཡོད་རྒུས་འགན་ལེན་བྱ་དགོས་ཞེས་ནན་གྱིས་བསྟན།
ཚོགས་འདུའི་ཐོག་ད་དུང་ཞིང་ཆེན་ཏང་ཨུའི་རྒྱུན་ལས་ཨུ་ཡོན་ལྷན་ཁང་གི(རྒྱ་སྐྱེད)ཚོགས་འདུའི་གཞི་རིམ་ཏང་འཛུགས་སྐྱོང་དང་།ཏང་སྲོལ་སྲིད་གཙང་།འདུ་ཤེས་འཛིན་སྟངས་ཀྱི་ལས་འགན་སྒྲུབ་ཚུལ་གསལ་བཤད་དང་དཔྱད་བརྗོད་ཚུར་ལན་གནད་དོན་དག་ཐེར་ཡོ་བསྲང་།2024ལོའི་འདུ་ཤེས་འཛིན་སྟངས་བྱ་བའི་འགན་འཁྲིའི་ལམ་ལུགས་དོན་འཁྱོལ།ཁུལ་ཡོངས་ཀྱི་ཕྱོགས་བསྡུས་སྨན་བཅོས་འཕྲོད་བསྟེན་སྒྲིག་སྲོལ་བཅོས་བསྒྱུར་བྱ་བའི་སྙན་ཞུ་བཅས་ལ་ཉན་པ་རེད།།